曾蔭權發爛渣

由曾蔭權領導的夕陽政府對雙非問題後知後覺，在食物及衞生局局長周一嶽與私家醫院商討明年雙非配額的關鍵時刻，曾蔭權更耗用巨額公帑遠赴新西蘭及南美外訪，幸得候任特首梁振英冒着被指架空現屆政府的罪名，主動出擊喝停有關討論。曾蔭權昨日早上終於返港，死撐與下屆政府交接無問題，對自己被架空、現屆政府被迫「跪低」之說一概否認。被問及是否已經淪為「跛腳鴨政府」，曾蔭權更心虛「發爛渣」，以疑似黑社會口脗狂吼：「六月三十號前，所有嘢我話事！」

外號「離岸特首」的曾蔭權的航班於昨早六時半抵港，但他遲至約七時十五分才步出機場貴賓室，原來是與晨早被他急召來「救駕」的特首辦主任梁卓偉及政府新聞處處長黃偉綸商討對策，以及「惡補」他在外訪期間發生的梁振英喝停雙非事件詳情。

曾蔭權之後笑逐顏開地於貴賓室外會見記者，大談外訪十一日的各項「功績」，隻字不提雙非問題。但記者第一條及之後多條問題，都是市民最為關心的雙非事件，質問曾蔭權現屆政府是否已被架空、政權交接是否不暢順、梁振英出招前有否知會他等。曾蔭權起初仍強作歡顏地逐一否認，死撐現時的做法正是兩屆政府共同商定的結果：「大家傾好一個安排，係市民所公認，反映出交接係成功。」

聞跛腳鴨心虛折返

曾蔭權又說，除雙非問題，部分跨屆爭議性政策均需尋求下屆政府共識。記者隨即追問現屆政府是否需向梁振英「每事問」？七一離任前他還有甚麼作用？曾蔭權開始收起笑容，死撐七月一日政府換屆前，所有行政工作及政制制訂仍然由他負責。

之後曾蔭權欲轉身上車離開，但聽到有記者問「現時政府係咪跛腳鴨政府？」曾蔭權立即心虛折返，回身向記者苦笑道：「唔係話依家跛或後面跛，點樣跛，根本香港政府就唔會跛！」

曾蔭權再答多一條問題後，第二度準備轉身離開，但當記者追問「覺唔覺得自己好慘」，曾蔭權又再次折返並「發爛渣」，高聲用疑似黑社會口脗，強調自己仍有話事權：「我再講多一次，六月三十號前，所有嘢都係由我話事，七月一號之後就由梁先生話事，呢個係事實嚟！」「呢屆政府負責人係我，七月一號後先係梁先生，好清楚！」

觸動神經瀕臨失控

記者之後轉為詢問立法會將就其「曾貪心」醜聞向他提出不信任動議，再次觸動曾蔭權神經，平日最多答兩三條問題甚至完全不答記者問題的他，忽然大方開放地說：「仲有咩問，繼續問啦、問啦？」期間更向在場記者指手畫腳，令人覺得他已瀕臨失控。

記者最後追問現屆政府是否向梁振英「跪低」及出現兩個權力核心，曾蔭權再次發難：「仲有咩問，問啦問啦！」他最終一共答了記者十五條問題，相信是除每年一度的施政報告記者會之最。

中大政治與行政學系副教授馬嶽表示，曾蔭權與梁振英政府就雙非問題的交接肯定不算暢順，否則梁便不用透過傳媒公開喝停周一嶽，曾明顯是在死撐：「曾蔭權政府已經跛咗好一段時間，今次事件令佢更加尷尬！」

「跛腳」曾蔭權返港記招對答實錄

先發表五分鐘開場白總結外訪紐西蘭及南美成果，隻字不提雙非事件，然後強展歡顏地開始接受記者提問。

第1問：雙非問題CY（梁振英）話二○一三年就停收，短短幾日咁大轉變，梁振英係咪架空咗成個特區政府？

曾：政府餘下任期，主要係保持交接順利過渡，盡量支持下屆政府工作。六月三十日前政策同政策落實，我負責，如果係七月一日後期負責落實，當然係下屆政府負責，如果有任何政策跨越兩個政府時，大家商定。

第2問：周一嶽同私家醫院傾緊，但梁振英又有建議，係咪當周一嶽無到？

曾：梁振英同我都有共同目標，一定係順利過渡，所有政策唔影響市民服務，我諗周局長同佢傾呢個問題，都係循呢個目標做事。

第3問：政府現時唔再同私家醫院傾，周一嶽做呢個決定前，有無通知你？

曾：（開始收起笑容及雙手放在胸前，表現出不耐煩）大家知道，關於呢個非本地孕婦產子（問題），我哋唔係現時開始傾，周局長同私家醫院傾咗兩年幾，不嬲都傾o架啦。你所講係出年配額，當然由下屆政府參與同認同。

第4問：兩個政府講嘅嘢有唔同，代唔代表交接有問題？

曾：我哋兩個交接一啲都無問題！我哋有定期性見面溝通，對於有政策係跨越七月一號時，一定要具體商談。下一屆政府係關於下屆配額，梁先生想七月一號之後宣布，我覺得呢個無問題。

第5問：CY之前有無同你傾過停收雙非?

曾：（先長嘆一聲，表現極不耐煩）呢個係香港人普遍關注嘅問題啦，我相信佢做所有決定，都係聽周局長資料，聽到市民意見做決定，梁先生自己解釋自己決定係點樣啦。

第6問：政府現時政策係咪都要同梁先生傾過先推出？

曾：（頭部微微向下，似有難言之隱）實情交接係全面性，爭議性大嘅具體政策唔係好多，例如雙非問題，香港人關注，我又關注，梁先生又關注，大家傾好一個安排，係市民所公認，反映出交接係成功。

第7問：其實七月一日離任前，你仲有咩作用？

曾：（開始黑面，語氣逐漸加強）我七月一號前，所有行政工作、政策制訂，都係由我哋負責，我哋決定，呢個一定係嘅！

第8問：但現時係咪「跛腳鴨」政府呢？

曾：（本來已轉身離去，但聽到「跛腳鴨」一詞後立即轉身補答）我再講清清楚楚，所有嘢都係以我決定，當然七月一號嘅嘢一定係梁先生決定，我哋希望你哋理解呢個安排先。唔係話依家「跛」或後面「跛」，點樣「跛」，根本香港政府就唔會「跛」！我哋最希望能夠係，市民服務一定唔受任何影響。

第9問：到今年下半年，（內地孕婦）衝關（產子）好嚴重？

曾：後續問題，行政上結果，相信大家要克服，但最重要係過渡安排。

第10問：曾生你會唔會覺得好慘，作為特首咩都要CY話事？

曾：（第二次轉身想離開，但聽到問題後再次回身，再長嘆一聲及深呼吸後回答）我再講多一次，六月三十號前，所有嘢都係由我話事！七月一號之後就由梁先生話，呢個係事實嚟。

第11問：公民黨向你提不信任動議，你有咩回應？

曾：我用謙虛態度聆聽各位意見，所有香港市民講嘅嘢我都要知，每個立法會議員所講嘅嘢，對我嚟講都係一個鞭策，我一定會虛心聆聽。（一邊手指記者，一邊發晦氣地說）問多啲，問晒佢、問晒先！

第12問：係咪多咗一個權力核心？

曾：（完全黑面兼嘴藐藐地答）永遠係一個核心，七月一號之前，行政機關核心，就係呢屆政府，負責人係我，七月一號之後，負責係下屆政府，個核心首腦係梁先生，好清楚無重疊。

第13問：事實上你雖然係核心，但制訂嘅政策畀梁振英推翻喎？

曾：（疑似發火反問記者）我哋邊一樣政策畀人推翻？

第14問：你哋同私家醫院商討咗兩年，但突然「跪低」。

曾：我哋所講現時所講，係舊年配額、今年配額。出年配額，一定要得到梁振英先生同意啦，係咪？……仲有咩問添，問啦問啦！

第15問：梁生嘅五司十四局好似到現時都冇任何進展？係咪可以喺七月一日之前做到呢？

曾：大原則係優先處理、保持今次交接安排順利，所有服務一定唔可以影響市民，如果有任何編制上更改，或架構上更改，一定同梁先生傾得清清楚楚。（轉身離開）