爛果報挑戰法紀 衞生署包庇淫媒

太一叮成日都話，淫賤黎冇錯係衰衰格格，壹淫媒的確係賤賤格格，不過咁，如果冇港英餘孽包庇放生，就算淫賤黎點樣衰格，壹淫媒點樣賤格，都無可能長期為所欲為，視法律如無物。呢嗱，壹淫媒又公然挑戰法紀嘞！

壹淫媒旗下爛果報觸犯淫褻條例案底纍纍，宣淫販賤當食生菜，家陣為咗撲水，竟然目無王法，以另類形式變相賣煙草廣告。讀者張先生向本報投訴，爛果報尋日以全版篇幅介紹雪茄，藉訪問中環某雪茄吧老闆為主題，詳盡描述雪茄嘅種類、價錢、售賣地點同地址等等，仲展示咗兩張吸食雪茄嘅照片，同賣雪茄廣告根本冇分別。

係人都知，本港八二年起已經全面禁止刊登煙草廣告，違例者最高可被罰款五千元，如屬持續罪行，罪行期間每日加罰一千五百元。爛果報掛羊頭賣狗肉，變相賣煙草廣告，唔止公然挑釁法紀，而且毫無社會道德可言。正如香港藥劑師學會會長蘇曜華話齋，煙草危害健康，傳媒為咗賺錢，將食雪茄包裝成生活品味，公然鼓吹吸煙等不良資訊，簡直係損害公眾衞生嘅幫兇！

其實，壹淫媒害人害物，變相賣煙草廣告已唔係第一次嘅喇。去年七月四日，爛果報喺副刊用咗近四分三版刊登咗一篇「嘆雪茄」嘅文章，圖文並茂，有人向衞生署控煙辦投訴，控煙辦調查後證實文章內容含有煙草廣告，已經違反吸煙條例。好喇，既然有人違例，當局又點做呢？講都冇人信，控煙辦只係畀咗封警告信爛果報就算數，連輕輕罰款都懶得做，問你服未！

學者宋立功就講得啱嘞，爛果報呢種踩界報道，就係要測試政府反應，試圖營造灰色地帶，如果政府唔喺開始時就加以遏止，呢類違規資訊將會不斷出現。

講開又講，正因為港英餘孽包庇呵護，壹淫媒先至會肆無忌憚嘅啫。好簡單，壹淫媒已有過百次違反淫褻條例嘅案底，如果當局依法辦事，執正嚟做，有人就算唔將牢底坐穿，都被罰到破產喇，點可能依家仲喺度「嘆雪茄」吖。嗱，爛果報去年被投訴違反吸煙條例，今年又嚟過，而且篇幅一次大過一次，咪就係當局包庇放生嘅結果囉。咪畀太一叮睇死吖，今次衞生署控煙辦可能又係側側膊嘅咋！

國之將亡，必有妖孽，壹淫媒一邊販賣色情，一邊鼓吹吸煙，係都要將香港搞到烏煙瘴氣。淫賤黎禍港殃民，港英餘孽淪為幫兇，罪無可恕，叮！