政壇：政商定格：稻香非執董出席率爆燈
飲食業搵嘅都係辛苦錢，舊年經營至為艱難，實施最低工資、租金升唔停、食品原材料價格隨通脹上升，稻香係飲食業一員，當然係一齊捱。
尋日咁啱睇到佢哋份年報，喺舊年嘅年度一共開咗四次董事會，十二位董事嘅出席率都係百分之百，就連其他會議，好似薪酬、審核、提名委員會，出席率都幾乎滿分。非執董及獨立非執董嘅出席率至為重要，因為佢哋係代表小股東，監察住公司係咪規規矩矩，稻香嘅非執董咁勤力，小股東都應該畀個「Like」啦！
喺月初同公司行政總裁梁耀進傾偈，佢話今年會開拓業務至廣東省以外嘅城市，所以都要多啲中港兩邊走，仲話上市五年以來，公司業務增長保持雙位數，都算對股東有交代咁話。
梁耀進話上市五年以來，公司業務增長保持有雙位數，都算對股東有交代。（資料圖片）