政壇：政商定格：翠華老闆嫁女豬仔包款客
翠華餐廳老闆李遠康嘅囡囡李倩盈日前同五金廠太子爺Ken鮑啟原結婚，佢哋中午先喺灣仔翠華餐廳宴客，影特色婚紗相，晚宴酒會時段就送上翠華自家出品嘅奶油豬仔包，夠晒創意。
現場仲發現餐飲聯業協會會長黃家和同立法會飲食界議員張宇人同場出現，佢哋由特首選舉到嚟緊九月嘅立法會選舉都鬥得難分難解，當晚就趁機「休戰」飲番兩杯。嗰晚首次榮升外父外母嘅李遠康同太太Fanny忙到滿場飛，李家太子爺李祉鍵就自爆話，今年底將會同女友Vivian拉埋天窗，龍年雙喜臨門，李遠康當然開心到合不攏嘴。
鮑啟原（右三）娶得美人歸，父母（左一及二）、外父外母李遠康夫婦（右一及二）真係飲得杯落。
黃家和（左）同張宇人（右）暫時「休戰」，把酒言歡。