政壇：搞搞政：鄉局謀統一口徑打硬仗？
新界鄉議局領導層一直好想團結班鄉紳，增強政治力量同籌碼。喺尋日鄉議局執委會會議上，就有個「商議本局成員應對傳媒訪問的發言規範及考慮引入指定發言人制度」嘅議程，唔通係想由統一口徑開始做起？
僭建風波不斷燃燒，一班鄉紳你一言、我一語，搞到訊息好混亂。鄉議局決定唔再畀班鄉紳任意發言，以免令人誤會該局立場，結果尋日就選咗十八鄉鄉事委員會主席梁福元做僭建事宜嘅發言人，其他人一律不建議發言。不過，話口未完，尋日梁福元發言之餘，上水鄉委會主席侯志強又出嚟噏嘢喇。
其實搵梁福元做發言人都合理嘅，事關佢一直都跟進僭建問題，鄉議局主席劉皇發之前講過，若政府一意孤行，可能會流第一滴血，而梁福元之後亦有提及類似嘅言論，可以話係緊跟立場。唔知佢會唔會RAMBO上身，同政府打硬仗呢？
設計圖片及對白