政壇：唐驥千聽講CY係好人
理工大學「唐炳源廣場」尋日舉行命名禮，作為已故南海紗廠創辦人唐炳源兒子嘅唐驥千同家人出席見證。唐驥千同特首候選人唐唐嘅爸爸唐翔千係同一個輩分，問對唐唐敗選有冇失望時，佢就不願置評，而對於唐唐日後何去何從，佢就話同唐唐只係遠房親戚，唔可以代表唐唐講嘢喎。反而佢就話聽朋友講CY係好人，希望係真咁話。
尋日適逢唐驥千八十五歲生日，太太唐潘靜筠同三個仔女、新抱、孫仔同埋佢喺理大切蛋糕。佢話理大同唐家好有淵源，事關佢爸爸早喺六十年代已擔任當時理工學院籌委會首屆主席。
理大校董會主席楊敏德亦特登為唐驥千唱生日歌。問佢有冇獲CY邀請留任行會，佢就話冇獲邀請，仲叫記者記得寫CY喺邊度畢業。CY係喺理工畢業嘅，楊敏德真係識為理大宣傳喇。
唐驥千（前）尋日生日，其家人聯同理大校長唐偉章（左一）及楊敏德（右二）為佢慶祝。