政壇：陳啟宗聲討煲呔曾房策

香港發展論壇尋日舉行「新特首‧新政‧新風」研討會，好多「梁粉」同疑似「梁朝」官員雲集。本來今次研討會主力討論「梁朝」施政，但多名與會者都開腔明批暗批煲呔曾同夕陽政府。

首先發炮嘅係CY嘅忠實支持者恒隆主席陳啟宗，佢對煲呔曾任內土地房屋政策感到莫名其妙，其中○六年至一○年期間冇賣地，佢認為只有兩個原因，一係「錯」同「蠢」，二係「有其他原因」。之後佢仲話點解今日社會有咁多矛盾，呢個係同樓價上升有好大關係。

言論引起嘉賓共鳴

陳啟宗其後疑似意有所指，話有啲人好易「買起」，知道你私生活就可以「買起」，相反CY就「買唔起」，所以大商家唔鍾意CY喎。佢又估計CY上任後，地產界會平穩發展，地產商會有錢賺，但未必會有「大茶飯」食，因為都賺咗幾十年嘞。呢段話，唔知係咪令人好有共鳴，台下嘉賓反應好熱烈。

港區全國人大代表陳智思其後批評財爺鬍鬚曾同部分局長，佢哋話有聽市民意見，其實係傳遞錯誤訊息，如果個個意見都聽，即係變相乜都唔做喎！