政壇：80秒短片宣洩後生仔不滿
香港青年聯會前主席許華傑嘅太太、香港國學中心主席Monin黃夢瑩最近創辦咗「八十秒文化集團」，準備喺六月份推出「香港．80秒電影節」，鼓勵鍾意拍短片嘅後生仔，將玩樂轉化為深層次文化，甚至提供表達不滿嘅發洩渠道。
Monin係大律師，喺百忙之中仍抽時間推廣文化。佢認為微電影係世界潮流，但時間長短各有不同，而八十秒係一個人專注力最集中嘅時間，啱晒繁忙嘅城市人利用空檔補充精神嘅糧食。
最近佢幾經辛苦，說服一位擁有「80seconds.com」網址嘅美國人，將網址賣畀佢，仲話要密切留意電影節嘅動向添。電影節徵求作品嘅時間歷時一年，明年九月會舉行頒獎禮，期間仲會教參賽者將短片剪接成微電影，希望藉此令電影節成為可持續發展嘅文化活動。
黃夢瑩（左）日前約咗北京四海孔子書院老師王悅（右）討論文化發展。