政壇：立會議員再培訓

香港回歸十五年，除特區政府施政公認差過港英殖民地政府外，回歸後班立法會議員嘅表現亦被指衰過前立法局，除咗成日開會遲到早退唔專心，淨係識爆粗掟嘢博出位，好多議員甚至連講嘢都唔識講，寫份法律文件甚至新聞稿都錯漏百出，整體民望跌到仲低過班政府高官。

立法會秘書處最近就請咗位英國爵士開班，教導班議員同議員助理點樣開會同面對傳媒。不過各位讀者可以放心，呢位英國爵士並非其身不正嘅特區之首煲呔曾，而係來自英國嘅正牌爵士Malcolm Jack。佢做過英國下議院秘書，夠晒資格教精班香港嘅後輩。睇嚟呢個「再培訓」計劃都係出自立會秘書長吳文華嘞！

課程費用公帑找數

有關特訓班由下月二日至四日及七日至十日，喺添馬艦新立法會大樓舉行。前者專畀班議員助理參加，主要教授議會實務常務同程序、撰寫文件同報告、法律及特權等基本議會知識等。後者就專為全體六十名議員而設，內容包括英國議會制度同程序嘅最新發展、議員與公眾同傳媒嘅關係、日新月異嘅綜合資訊服務等。有關課程全部免費，即係由秘書處以公帑找數囉。

香港回歸咗十五年都培訓唔出一位議會專家，要花納稅人嘅血汗錢專程請洋人來港開班，真係失禮死人，應該喺班議員人工度扣番錢先啱。再者今屆立會任期仲有幾個月就完結，依家使呢筆錢培訓可能會落選嘅議員，係咪用得其所呢？

講開議員人工，早前班議員去信負責檢討議員薪津嘅獨立委員會，質疑對方早前建議嘅議員薪津加幅過低。委員會日前回信立法會，重申有關建議已經過深思熟慮，唔會再加碼，會如期喺本周五向財委會申請撥款。如果班議員繼續冇自知之明嫌加薪加得少，有膽就一拍兩散投票否決有關撥款，為納稅人慳番一筆！