官淫勾結解不開 檢討條例也枉然

叮叮叮！都話夕陽政府勢必將爛攤子留畀下屆政府執手尾o架啦，果然一啲都冇講錯。《淫褻及不雅物品管制條例》第二階段公眾諮詢展開嘞，諮詢期至七月十五日。亦即係話，七月一日政府換屆之後，曾蔭權拍拍屁股走人，黐實富豪玩遊艇又好，玩飛機都好，淫褻條例嘅檢討工作已經唔關佢事。

商務及經濟發展局局長蘇錦樑話喎，政府就如何改革淫褻物品審裁處嘅制度提出兩個方案。第一個方案係由政府委任法定審裁機構及上訴委員會，代替淫審處評定淫褻物品嘅類別。第二個方案係廢除淫審處嘅行政職能，只負責司法裁定工作。

另外，政府建議觸犯淫褻物品罪行由現時最高罰款一百萬，提高至二百萬元，最高監禁年期維持三年。不雅物品方面，首次定罪罰款增至最高八十萬元，最高監禁年期維持一年，再次定罪罰款增至一百六十萬元，監禁年期最高增至兩年。

蘇局長噏咗一大堆，太一叮勸大家聽完就算，學似網民話齋，認真你就輸了。好似淫賤黎旗下壹淫媒咁吖，違例案底厚過電話簿，即使唔檢討唔修改，按照現有法例已經可以告到佢甩褲，甚至收監法辦都仲得。之不過咁，港英餘孽包庇縱容吖嘛，壹淫媒就算係死性不改嘅超級積犯，罰來罰去都係不痛不癢，極其量罰款三幾萬元，坐監呢支歌仔冇唱過。

喂，唔好唔記得公民黨同民主黨收咗掩口費o架，淫賤黎曾經向兩黨捐款二千五百萬元，結果呢兩個平時滿口仁義道德嘅政黨就同流合污。冇耐前之嘛，立法會出現好多民間團體公審壹淫媒旗下《爽報》，指摘呢一份鹹濕免費報誨淫誨盜教壞細路，哈，一向聲大夾惡嘅公民黨同民主黨忽然之間扮溫柔喎，冇聲討，冇圍剿，冇為民請命。受人錢財，替人消災，政客都做咗淫賤黎嘅私人保鏢，你話檢討淫褻條例有乜用吖，叮！

所以話啫，是否檢討修改《淫褻及不雅物品管制條例》仲係次要，最重要嘅係拆除淫賤黎嘅保護罩，咁先至可以撥亂反正掃除淫風。正如貪曾嘅所作所為話畀大家知，香港真係有官商勾結，淫賤黎嘅特殊優待就反映另一個殘酷現實，香港係有官淫勾結o架。

計太一叮話齋，官淫勾結解不開，檢討條例也枉然，即使修例修到最高監禁一萬年，超級積犯都係逍遙法外o架咋。叮爆你個鎯鎯！