政壇：視察村屋梁美芬甩底

新界村屋僭建風波，政府話唔會特赦，新界人又話會流血抗爭，唔知點收科。近期成為「新界代言人」嘅全國政協委員劉夢熊就有新動作，佢話搵到本身係律師嘅立法會議員梁美芬支持，認同新界僭建問題可以用補地價解決，特赦冇危險嘅僭建物。佢話梁美芬身為法律學者，講嘢好有權威性，政府應該聽聽喎。

劉夢熊尋日爆料話，早幾日喺酒店密會梁美芬，大家飲茶傾吓偈，點知兩人一拍即合。梁美芬承認真有其事，又話從法律觀點睇，新界村屋只要符合安全，點解唔可以特赦喎。佢仲建議成立委員會，審查班鄉紳係咪「貪婪」，如果係先至強硬執法拆卸。但到底點衡量一個人係咪「貪婪」，真係佢先至知。

佢尋日約咗十八鄉鄉事委員會主席梁福元去東頭村視察村屋，本來叫埋梁美芬入去，但最後梁美芬甩底唔見人，佢惟有話「美芬」因為要開會嚟唔到。最後為咗同班熱情鄉親交代，佢仲即場公開梁美芬個手提電話號碼，叫大家有乜事可以打畀美芬喎。