政壇：夕陽政府曲線護貪曾

為咗轉移大家對聽日立法會大會討論議員提出對煲呔曾不信任動議嘅視線，夕陽政府尋日又重施故技，不經深思熟慮就求其推出極惹火嘅政策安排，包括《淫褻及不雅物品管制條例》嘅第二階段諮詢，企圖臭屎密冚，兩單嘢冚一單。

譚志源赤膊上陣護駕

煲呔曾貪盡富豪海陸空款待令全城嘩然，其後又爆出佢以「無字天書」規管自己利益申報，社會要求加強規管特首利益申報嘅呼聲愈嚟愈高，立法會尋日討論特首申報利益及避免潛在利益衝突安排，理應各界都會金睛火眼（目及）到實，點知夕陽政府又出陰招保駕護航，首先派出較低級嘅政制及內地事務局副秘書長梁松泰上陣，將問題卸晒畀獨立檢討委員會考慮。

與此同時，商務及經濟發展局局長蘇錦樑突然將封塵多時嘅《淫褻及不雅物品管制條例》再諮詢三個月；而曾經做過特首辦主任嘅政制及內地事務局局長譚志源亦赤膊上陣，除交代九月立法會選舉實務安排外，又講司局長薪酬釐定同區議會「連環種票」事件後嘅選民登記制度。明眼人都睇得出佢哋想淡化尋日立法會就特首利益申報嘅討論，同埋聽日立法會對煲呔曾嘅不信任動議。

由於周三立法會大會要處理嘅動議好多，估計對煲呔曾嘅不信任動議最快要喺周四下午先可以表決。據聞煲呔曾緊張兼騰雞，特首辦於是派人四出向建制派議員拉票，包括詢問佢哋由聽日起一連三日係咪身在香港，務求任何時候表決都有足夠嘅人否決呢個不信任動議。話時話，夕陽政府用舊橋幫煲呔曾臭屎密冚都唔係首次，煲呔曾次次出事都要人哋打救，認真累人累物。