李國寶闢天台屋 權貴僭建圍威喂

僭建醜聞愈揭愈多，同曾蔭權關係密切嘅東亞銀行主席兼立法會議員李國寶，被踢爆位於山頂白加道嘅豪宅懷疑僭建，多咗一間約一千平方呎嘅天台屋。有人計過數，以山頂豪宅呎價約五萬元計，呢間僭建天台屋閒閒哋值五千萬，犀利呢！

若要人不知，除非己莫為，僭建醜聞曝光，李國寶先係死撐，話相片見到嘅係「太陽能板」，後來先至改口話間屋唔係佢設計，若有僭建就會拆喎。咁即係不打自招喇，果然係「曾朋友」，學足煲呔曾蠱蠱惑惑，醜聞被踢爆仲想蒙混過關。

叮！身為立法會議員，居然詐傻扮懵，目無王法，十足十好似前排被踢爆僭建「地下王宮」嘅唐英年咁，大話連篇，醜態百出。無計喇，大家都係「曾朋友」吖嘛，呢啲咪叫做物以類聚，人以群分囉！

查實，「曾朋友僭建營」好有來頭o架，除咗李國寶同唐唐，「營長」煲呔曾半山麥當勞道嘅「祖屋」僭建、立法會前議員鄭經翰嘅山頂豪宅亦有僭建天台屋，高官權貴其身不正，唔怪得其他人有樣學樣，僭建歪風禁之不絕喇。

話時話，新界居民抗拒當局清拆村屋僭建物，唔係完全冇道理o架，既然高官權貴嘅豪宅都僭建咯，點解村屋唔准僭建先？唔通真係只准州官放火，不准百姓點燈咩。嗱，咪話太一叮唔提醒吖，當局執法還執法，最緊要一視同仁，如果親疏有別，放過權貴咯喎，咁唔只新界居民抗議，全港市民都唔服o架，因住官逼民反，隨時百萬人上街都有之。

正如北大人話齋，子帥以正，孰敢不正。煲呔曾亂港七年，禮崩樂壞，貪腐成風，搞到香港亂七八糟，連立法會亦烏煙瘴氣。呢嗱，李國寶生人霸死地，坐喺議事堂二十年，但就出晒名「三點不露」，對上一個立法年度佢嘅不投票率居然接近九成，問你服未。咁嘅大懶蛇唔只佗衰立法會，直情係國際大笑話，影衰埋成個香港添吖！

不過咁喎，李國寶出席立法會就懶啫，但講到攞着數搵小股東笨，佢就一啲都唔執輸o架。當年東亞銀行受到金融海嘯影響盈利大倒退，佢嘅酬金居然不減反增，高達五千七百幾萬元，仲多過業績高峰期，結果被小股東問到口啞啞。

所以話，近朱者赤，近墨者黑，煲呔曾貪威識食，大小便宜都唔放過，「曾朋友」自然亦係同類貨色，叮！