政壇：政商定格：王冬勝李少光高球賽奪季
今年龍傳基金高爾夫球慈善賽由深圳移師到東莞舉行，政商界名人共一百位高球好手組成二十五支隊伍參賽。向來喺高球場最合拍嘅保安局局長李少光同滙豐銀行亞太區行政總裁王冬勝，今年繼續組隊參賽，最後王冬勝蟬聯「男子組個人一桿最近洞獎」，而佢同李少光嘅隊伍就奪得隊際總桿季軍。
今次參賽嘅名人依舊有前高官馬時亨同金利來太子爺曾智明太太黎瑞恩，當然唔少得作為球賽會副主席Tenniel朱鼎耀啦！Tenniel嘅高球技術向來出眾，今次佢個人又奪得三個獎項，包括男子組個人最遠距離獎、個人兩桿最近洞獎及個人總桿獎，而佢組成嘅隊伍更奪得隊際總桿獎冠軍添！
王冬勝蟬聯「男子組個人一桿最近洞獎」。（受訪者提供）
朱鼎耀個人亦奪得三個獎項。（被訪者提供）