政壇：政商定格：特步慶十周年送寶馬金鞋
內地體育股舊年業績令人唏噓，但特步份成績表都算吐氣揚眉，主席丁水波亦好識做，日前趁品牌搞十周年慶典，大手豪送寶馬（BMW）汽車同足金波鞋畀一班優秀嘅合作夥伴以示獎勵，唔似其他同行逼代理商「科水」綑綁式買貨咁趕客。
喺慶典現場，特步旗下明星代言人總動員賣力獻唱。佢哋有個包羅晒旗下代言人嘅「特步家族」，代言人始祖謝霆鋒都難得現身，加埋潘瑋柏、韓庚同蔡依林，特步近年俘虜唔少年輕粉絲。
特步話明今年會推出多項宣傳活動，務求催谷銷情兼塑造形象，所以今次慶典亦趁勢打響宣傳頭炮，就係連簽兩位全新跑步系列產品代言人，包括著名影星桂綸鎂同最新世界室內短跑冠軍加特林（Justin Gatlin），睇嚟特步家族陣容勢將壯大。
