政壇：搞搞政：陳岳鵬失業抓撈
前匯賢智庫成員Ronald陳岳鵬，喺一○年辭去原有嘅南區區議員職務，丟低班選民過檔特首辦做特別助理，結果匯賢嘅候選人喺佢騰空嘅議席補選輸得一敗塗地。
依家呢位「叛將」面臨失業，有新民黨中人預計即使佢有意回巢，相信黨主席葉劉淑儀亦好大機會唔同意。加上CY梁振英已搵咗三個「近身」洪綺敏、馮英倫同陳冉加入候任辦，如無意外七一後會順利過渡至特首辦，令佢繼續留喺特首辦嘅機會近乎零。
有政界中人認為喺外國著名學府畢業嘅Ronald，最腳踏實地嘅做法係喺未來呢兩個半月爭取表現，希望得到其他問責官員賞識。有人估計最大機會接收佢嘅係政制及內地事務局局長譚志源，據聞佢哋之前喺特首辦合作無間，只要譚順利延任新政府，有機會引薦佢「轉會」到政制局擔任政治助理，甚至更上層樓至副局長同佢拍住上添！
