政壇：邱騰華被數四宗罪
環境局局長邱騰華尋日休緊假都接受電台訪問，點知中伏，被人窒到口啞啞。話說主持問到，如果立法會唔支持興建焚化爐佢會唔會失望，佢就好坦率話：「當然會唔開心！」點知主持打蛇隨棍上，列舉佢四大劣績，包括慳電膽、堆填區廢除特首令、兩電加價及面臨觸礁嘅焚化爐，叫佢揀邊樣最唔開心。
邱騰華於是帶大家遊花園，話如果正面啲諗，當年大家都擔心膠袋徵費得唔得，但依家有九成市民支持，仲話啱啱諮詢完垃圾徵費，都估唔到有多於一半市民支持。佢仲話會努力游說議員，期望兩個月內獲得撥款興建焚化爐。
但佢嘅如意算盤未必打得響，皆因泛民主派同建制派都表明現階段「支持唔住」，睇嚟興建焚化爐連通過下周五立法會環境事務委員會「第一關」都勢危，難以令人想像未來兩個月去工務同財務委會有乜大轉向喇！
邱騰華休假接受電台節目訪問，點知中伏收場。