政壇：林大輝露家臣本性

被稱為唐唐「家臣」嘅廠商會立法會代表林大輝，由頭到尾都係唐唐嘅頭號悍將，但喺特首選舉過後，唐營勢力被迫歸邊，就算唔挺CY梁振英，都唔敢插佢一刀。好似大輝喺最新一期嘅立法會通訊入面，似乎對CY嘅態度有所軟化，但睇真啲原來又內有玄機。

雙面人表面挺梁

大輝份立法會通訊，每次都有封面人物，但三月號就冇咗，封面大大隻字寫住「經濟隱憂、防患未然」。究竟要防邊個？真係值得細味。佢提到自己曾向煲呔曾提出質詢，要求佢認真處理好交接工作，以維護下屆政府威信，又話自己支持成立調查委員會查CY，係因為政府選擇性放料，令市民唔清楚真相。就咁睇，佢絕對係幫CY講好說話，分分鐘以為佢棄唐投梁，做咗「俊傑」。

但留心啲睇就發覺有弦外之音，因為成份通訊得兩張相有ＣＹ個樣，但有唐唐樣嘅相就有成四張咁多，而且ＣＹ啲相唔係影到頭耷耷，就係鬼咁細張，要用放大鏡至睇到，相反唐唐啲相張張都大頭，而且笑容滿面。睇嚟表面挺梁，暗地撐唐，先係大輝真本性。咦！咁咪即係做雙面人。

其他挺唐派人士又點呢？好似前晚冇去大和解飯局嘅金融界李國寶，就話自己一個月前已約咗維他奶主席食晚飯，所以未能赴約；富貴黨主席劉健儀，就念念不忘同黨友食豬扒飯嘅時刻，尋日見到記者時，仲不停講有幾好味，似乎根本唔志在同CY食飯。

經濟動力嘅林健鋒仲話，自從前晚食飯時問CY會唔會秋後算帳，得到個答案係「唔會」之後，相信好多建制派心中嗰條刺會自動甩晒，叫大家唔使驚喎。