政壇：「汽車世界特別號」 名人閱後讚吸引

本港有好多愛車之人，為咗照顧車迷嘅口味，《東方日報》早前強勢推出「汽車世界特別號」，於每月嘅第二個星期五派發，當中嘅汽車資訊大幅強化，內容更見豐富，務求令到唔同階層嘅車迷都睇得津津有味。尋日推出第二期特別號，我哋特別請來兩位模特兒喺中環娛樂行派發，好多城中名人型男靚女索閱後都話好吸引，仲同記者分享佢哋多姿多采嘅駕駛體驗添！

蔡加讚對汽車刊物要求高

旭日國際集團執行董事Karson蔡加讚年紀輕輕，已有十年駕駛經驗，佢話好細個已對汽車有濃厚嘅興趣，十六歲就喺美國考獲駕駛執照。身為汽車發燒友嘅佢對汽車刊物都好有要求，佢話除咗圖片要精美外，內容都好重要，尤其係汽車嘅測試報告，汽車性能同體驗都係佢好感興趣嘅。此外，車廠嘅歷史故事與發展策略，都係值得一讀嘅文章。

至於Karson買車嘅要求係「因車而異」，例如七人車要講求舒適，跑車就要講究操控同外形，佢仲講笑話，買車有好多車款任佢挑選，遠不如揀女朋友咁複雜喎。Karson索取「汽車世界特別號」後，跟住又見到名媛Anina何倍倩經過索閱，原來佢同Karson一樣都係十六歲就考獲駕駛執照，咪睇Anina嘅外形嬌滴滴，佢自言手握軚盤就係辣妹一名。

Anina嘅丈夫都係車迷，所以屋企有好多汽車刊物，最鍾意睇車壇新消息及測試報告，閒時兩夫妻可以一齊研究吓。佢喜愛外形得意嘅車款，第一部車就係白色甲蟲車。佢又憶述最驚險嘅駕駛體驗，就係喺路面遇上冰塊，導致車輛失控打咗幾個白鴿轉，幸好當時公路嘅汽車流量好少，不致有嚴重意外。

尋日仲見到廠商會副會長吳永嘉經過，佢話平日都好留意車壇嘅動向，特別係車展嘅報道，故此佢好重視汽車刊物嘅新車介紹。至於名媛李桂蘭就話，香港路況複雜，曾經試過喺觀塘迷路不知所措，所以佢只會喺英國駕駛喎。