市民唔識笑 香港真不妙

「笑一笑世界更美妙」，記得當年本港旅遊業嘅宣傳口號嗎？事過境遷，笑臉不再，今時今日嘅服務業員工留畀旅客嘅印象竟然係唔識笑，睇嚟香港真的不妙！

國際神秘顧客服務協會針對全球三十二個國家及地區嘅調查發現，香港嘅微笑指數連續第二年排尾三，仲低過首次參與調查嘅澳門，只係比墊底嘅克羅地亞同巴基斯坦好少少；招呼語指數更創咗新低添，只能排尾二，簡直羞家。

克羅地亞同巴基斯坦，一個失業率超過百分之二十，大批公僕被炒魷；另一個長期飽受種族衝突同恐怖襲擊蹂躪，民不聊生。香港自稱國際都市、亞洲金融中心，待客之道竟然同呢兩個國家「排排坐」，真係乜架都丟晒咯！

正如廣告話齋：今時今日咁嘅服務態度未夠！服務業係本港經濟命脈，旅遊業係四大支柱之一，前線員工唔止冇發自內心嘅微笑，連機械式嘅笑容亦欠奉，個個苦瓜乾咁面口，分明趕客嘅啫。生意興隆，客似雲來就冇嘞，自己倒米，遲早執笠就真。

話時話，唔識笑嘅何止服務業員工，全香港七百萬人，又有幾個笑口常開吖。唉，有頭髮冇人想做瘌痢，心情靚點會唧都唔笑吖？其實港人唔係唔識笑，而係笑唔出。政治紛爭沒完沒了，貧富懸殊愈來愈尖銳，政府施政無能，官員碌碌無為，甚至弄權徇私，咁嘅環境，笑得出至奇啦！

調查顯示，澳門服務業員工比香港同行更和藹，更多笑容，其實一啲都唔出奇。呢，人哋澳門年年有錢派，啱啱又宣布每名永久居民派七千蚊嘞。濠江政通人和，社會穩定，生活指數低，連空氣都比香港清新啲，澳門人想唔笑都幾難！

睇番本港，真係眼冤，生老病死、衣食住行樣樣都煩，市民有一萬個笑唔出嘅理由。人工加幅遠遠追唔上通脹，樓價失控注定一世做無殼蝸牛，咁都不特止，產婦分娩要同雙非孕婦爭床位，長者等到死都輪唔到安老宿位，公立醫院醫療醜聞爆不停，骨灰龕位供不應求，基層市民百事哀，問你點笑！

政府無能，高官無恥，市民無奈，回歸短短十五年，香港由亞洲四小龍淪落為悲情城市，港人欲哭無淚，點笑得出吖，叮！