政壇：搞搞政：坐監剪短髮 長毛未驚過

社民連主席梁國雄一把長髮係佢嘅特徵，隨着上年衝擊替補機制單案宣判，長毛被判入獄兩個月，如果上訴唔成功，即時收監，佢都勢必要同把長髮拜拜。長毛話驚都無驚過，因為自己生長力極強，留長頭髮半年就可以過頸，咁算唔算半年之後又係一個長毛？

據《監獄條例》，成年囚犯規定要剪短頭髮，不成文規定只係規定二十五歲或以下男囚犯先要剷平頭裝，所以長毛一旦入獄，必須剪髮。睇番資料，長毛未做立法會議員之前都坐過兩次監，兩次都有「被剪髮」，坊間曾有佢會挑戰《監獄條例》之說，似乎唔當得真。

長毛尋日話自己留長髮無特別意思，只係細個時開始留，覺得幾啱自己咪留到依家囉。佢仲話無論長髮定短髮，都會繼續抗爭，唔會有咩分別。佢仲話，頭髮生得好快，通常半年就可以過頸，所以就算被懲教署職員「剪完」，唔夠半年實會變番一頭長髮。