黑白灰：生老病死

本地人想唔想做香港人都難，只睇生老病死四個字，都已令人十分心煩。

投胎要做香港人怕且都唔係咁難，閻羅王批准即可；不過，要喺香港出世，攞番張出世紙，反而冇咁輕易，十個月前要預訂醫院產房床位，公立醫院固然早早全院滿座，就算有錢要住私家醫院，人家都未必睬你。唔通生嗰陣又學人衝急症室咩？睇見啲未來媽媽粗身大細周圍撲床位、儲奶粉，你話心唔心煩？

鏡頭一轉，七十五年後，有幸當年喺香港出生嘅港人，除非染髮，否則早成銀絲一族，中間經歷咗多少酸甜苦辣暫且不表，依家好彩嘅，可能有兒孫照顧，或者手上仲揸番層樓同少許積蓄，請個外傭服侍，仲可以有番啲人生樂趣；如果要靠生果金維生，或者無人照料，要入住安老院舍，排隊起碼要排三五七年，到死都唔知排到未，你話幾論盡？

如果再加上長期病患，更加苦不堪言。公立醫院淨係輪籌睇街症都有排輪，本人曾經此苦，等三個鐘頭攞兩包感冒藥；排期入院動大小手術，可能要等十零個月，冇病都等到病。醫院人手不足，隨時可以發生嚴重醫療事故，只能聽天由命。私立醫院又淨識睇住個錢字，睇怕好快我哋本地人就要同外地有錢人競投床位先至有得入院養病。

做人既然咁艱難，想話唔做香港人，早啲移民陰司，點知死都唔容易，公立醫院環境惡劣，想搵個靜靜哋嘅床位舒服莊嚴上路，唔使旨意；搵間殯儀館係咁意做番些少儀式，排到期都要花上十萬八萬；入土為安今日已成侈想，焚化爐要等三、四星期，化為灰燼之後，仍然無處容身，事關骨灰龕位難求；生前唔識游水，死後至將我啲骨灰倒落大海，諗吓個心都唔多安樂。

生老病死係人生必走階段，依家搞成咁，點算？