營養標籤失實 食安中心失職

民以食為天變咗民以食為憂，近年食品安全危機四伏，真假難分，優劣莫辨，皆因港府渾渾噩噩，監管失職，連拉警報都懶。嗱，呢啲就叫病從口入，禍由官生嘞！

自從本港實施營養標籤法例，好多人以為產品成分一目了然，可以食得放心嘞啩。點知純粹係美麗的誤會，旨意官府把關，中咗招都唔知。呢，食物安全中心今年頭兩個月抽檢食品發現，不合格率近百分之五，有五款食品營養素含量同標籤標示不符，唔止報細數，甚至弄虛作假。好似其中一款五香豆乾咁，鈉含量爆晒燈，高出標籤標示六倍有多。正如有立法會議員話齋，制度生效多時，不合格率仲有咁高，顯示食安中心抽檢不足，拖低阻嚇力。

生產商博大霧，一啲都唔出奇，最離譜係當局竟然罔顧公眾利益，間接充當幫兇。營養標籤公然造假，食安中心漫不經心，淨係鬼鬼祟祟喺網上披露問題食品名單，好似唔想畀人知道，真係莫名其妙。

叮！食品安全事關重大，資訊披露愈早愈好，範圍愈廣愈好，知道嘅人愈多愈好，咁簡單嘅道理，連小學生都明白，唔通食安中心唔明？話時話吖，港府咪有個新聞處嘅，點解唔透過該處發放問題食品訊息，而係玩神秘，閃閃縮縮呢？

試諗吓，食安中心只係將檢測結果放上網，有幾多個長者會睇到？有幾多個長者會用電腦？最需要獲得食物安全資訊嘅老人家反而被拒諸網外，淪為問題食品嘅受害者，當局簡直係草菅人命，叮！

講開又講，生效近兩年嘅營養標籤制度先後被審計署及消委會踢爆漏洞處處，除咗部分標籤字體太細，要攞放大鏡至睇得清，原來三歲以下兒童食物根本唔受規管，咁嘅標籤制度根本形同虛設！

其實，講到食物安全問題，又點只營養標籤漏洞處處吖，有環保組織喺內地買咗十八款茶葉化驗，結果發現所有樣本至少含三種殘餘農藥，有個樣本甚至含十七種內地禁用農藥添。大家咪以為呢啲茶葉唔關香港人事，其中多個品牌嘅茶葉香港亦有售，即係話，由於港府把關不嚴，港人唔知將幾多殘餘農藥飲咗落肚，你話係咪靠害吖！