政壇：政商定格：兩女外遊唔陪肥亨過節
復活節好多港人外遊，剛剛辭任中策集團主席嘅前商務及經濟發展局局長馬時亨（肥亨）都同太太王培琪及一班政商界「波友」飛去關島同塞班島，打足七日高爾夫球。肥亨話，自己係首次去關島，大女馬露明（Christine）同細女馬露玲（Andrea）就無隨行，肥亨笑笑口咁話，女大女世界喇，唔通仲咁黐家咩！
原來兩個囡囡喺復活節分別去咗唔同地方，已為人婦嘅Christine同老公度第二次蜜月，漫遊法國及意大利八日，而Andrea就去咗青藏高原東北部嘅青海，為教會傳福音。青藏高原海拔成四千五百米咁高，肥亨當初都好擔心囡囡去到當地會患上高山症，好彩Andrea無事返嚟。
關島杜夢灣風景靚絕，度假村林立。（資料圖片）
馬時亨話復活節去咗關島同塞班島打高爾夫球。