政壇：阿爺發功大和解飯局爆棚

一場特首選戰，搞到香港建制派裂痕加深，捧唐派對梁振英（CY）當選暗地裏表現得好唔高興，民建聯主席譚耀宗搞咗場「大和解」飯局，今晚就會喺中環中華總商會舉行。原本飯局反應麻麻，但本周一工聯會訪京期間，港澳辦主任王光亞就開到聲叫大家大和解後，飯局行情忽然看漲，參加者即時激增，出席者分分鐘達立會建制派嘅三分之二。

大和解飯局對象係立法會內嘅建制派議員，最初報名只得小貓三幾隻，捧唐派議員都拒絕出席，有啲仲講到明同CY無嘢好講、無嘢要傾，態度之強硬令人為之側目。據知，有三分一唔出席嘅議員各有理由，被指同CY反晒面嘅自由黨，主席劉健儀解釋因有親友喺醫院，副主席張宇人就聲稱事忙所以唔去，只得另一副主席方剛肯捱義氣出席。

唐唐「家臣」林大輝出席機會亦唔高。謝偉俊就斬釘截鐵話一定唔出席，因為佢要繼續喺專責委員會查CY喺西九單嘢，為咗避嫌一定唔去喎。總商會及工業總會議員林健鋒同梁君彥雖然挺唐，今晚都會出席，話想聽CY有乜嘢講喎。