政壇：寸泛民立選太貪心

九月立法會選舉嘅布局戰已經開打，尋日民協就高調舉行記者會，除咗公布將派人參加九龍西、九龍東及新界西嘅直選賽事外，該黨仲整咗份「輸凸啦的名單」，意思係如果泛民照名單搶攻超級區議會嘅五個席位，肯定三席不保，民協嘅立法會議員馮檢基似乎好迷信所謂選民六四分嘅黃金比率，誓言泛民協調就可取三席，佢嘅潛台詞其實係泛民出三條名單就掂，好似家吓多到唔知幾多隊，咁就大鑊喇！

六四黃金比率危危乎

呢次超級區議會嘅新玩法吸引各黨各派，建制派虎視眈眈，泛民又山頭林立，到依家泛民都未協調好出選名單，淨係家吓都有五個爭住要出選，當中除阿基外，白鴿黨都有兩人，其他黨派仲未表態，前期協調亦未曾有，民協心急都冇用，不過，民協主席廖成利就將所有備選人名，組成一張命名為「輸凸啦的名單」，意思係照呢種混戰局面，泛民實會輸凸啦！

民協咁落力游說泛民只出三隊，阿基就話到明，泛民只有統一票源，先有望力保三席，不過，民協呢個如意算盤打唔打得響都好難講，事關建制派方面，民建聯打算攻兩席，工聯會嘅陳婉嫻又有票后之威，而且形象中立，喺全港大選區中，可取唔少中間及民生票，係打破六四分割比率嘅有力戰將，反而泛民呢邊就冇一個可取中間票嘅人物，再加上前期協調都未見，最終傾唔傾得成都係問題，阿基嘅幻想會唔會係太美好呢？

民協副主席譚國僑尋日力銷民協出選有助泛民擴大基層選票版圖。講嚟講去，就係等緊泛民大黨向佢哋打開磋商之門。以民協打算三區直選、組成「風車陣」嘅計劃，風車吹唔吹得郁都好，縱使泛民協調失敗，佢哋只要喺區議會搵多一個提名就湊夠十五個提名，點都可以確保一個人入閘。揸住咁嘅牌，再加上「輸凸啦的名單」，泛民大黨睇怕都會感覺有壓力！