殯儀服務加風勁 窮人嘆死都唔掂

香港人愈來愈長壽，男士平均壽命為八十歲，女士仲勁，有八十五點九歲，僅次於日本女性嘅八十六點三四。香港人應該好快超越日本成為全球最長壽人種嘞，事關實在死唔起，不敢死！

點解咁講？因為「大酒店」大幅加租，基層望而卻步囉！最近幾個月，殯儀服務全部起價三至五成，一間比劏房大少少嘅最細靈堂，都要由三千三百蚊加到五千五百蚊。連鎖效應之下，喃嘸、紙紮同布置亦一律加價一成至一成半，夾夾埋埋，一個似樣啲嘅喪禮要成四萬幾蚊，幾乎係基層市民嘅半年人工，睇你點死！

香港又冇地震、又冇瘟疫，點解殯儀館會突然坐地起價？叮佢個鎯鎯，呢樣就要問港府嘞。呢場殯儀加價風暴其實發源於一間位於紅磡嘅殯儀館，呢間殯儀館由政府擁有，喺市政局年代唔錯o架，為窮等人家提供收費低廉嘅善終服務，令貧困者可以有尊嚴地走完人生最後一程。

之不過回歸之後就唔同晒咯，港府乜都講錢，十年前將殯儀館服務外判，最近一次仲飛擒大咬，價高者得吖嘛，結果創出財團以二億八千萬元中標嘅天價紀錄，比五年前嘅九千幾萬高出近兩倍！

麵粉貴，麵包自然跟住貴。港府見錢開眼，大發死人財，投標殯儀服務創天價，隔籬嘅殯儀館梗係紛紛加租啦，連帶其他法事、紙紮亦全部跟風加價。多個團體尋日狠批當局帶頭掀起殯儀業加價風暴，令貧苦大眾「死都唔掂」！

講起上嚟，「死」呢個字，對基層市民嚟講實在太沉重嘞，一個唔好彩兩腳一伸，跟住嚟嘅煩惱可以話沒完沒了，又驚肉身喺公眾殮房無緣無故失蹤，又怕輪候唔到骨灰龕位，死無葬身之地。家陣仲要擔心多一樣，隨時無得喺「大酒店」同親友告別，最後一程都要孤伶伶上路，諗起都夠晒淒涼！

所以話啫，香港人家陣真係死唔起o架。仲有一樣嘢唔好忘記，食衞局局長周一嶽領導無能，安老宿位奇缺，想入住惟有大排長龍，冇番三年五載都冇位，想睇病咩，又要輪候床位，唔長命都唔得喇。

周一嶽，你上場咁耐就害足香港人咁耐，搞到民怨沸騰，就算今日大家奈你唔何，第日你百年歸老入住「大酒店」，小心不得安息嘅鬼魂搵你算帳呀，叮！