SUN微博：打橫嚟講：貪曾競選承諾：玩鋪勁　

一世估唔到，曾蔭權咁有口齒，確實執行佢嘅競選承諾：到尾一定玩鋪勁。

不足一百日，煲呔就要捲被鋪起錨鬆人；雖然，這三個月內，佢連同廢柴班底嘅夕陽政府，只不過係看守式掌門狗，但過渡期間，總有一啲交接工夫要做，向下屆特首報告報告，甚或要拆走那些埋下的地雷，不能謀害新主領導，延禍香港社稷。

嗄！點知，呢件香港蠱惑仔，一早plan定做特首就是為了「玩鋪勁」的宏願，現趁人生最後呢八十日自由（將來係點？大家有眼睇！），居然，盡用做特首的特權quota，無情情，使公帑四出外訪，來個二十一世紀八十日環遊世界，玩串海陸空。佢真係白癡到當人哋傻o架，有大deal，人家都留番同振英哥傾啦！

看到貪曾鬼祟兼密麻麻咁外遊消息，對照此地另一個廢柴政府高官，那孫公明揚，心裏實在很難過。

孫公出名老油條軟皮蛇，做乜都hea吓hea吓！給人印象麻麻，尤其佢公然開會大覺瞓，後來，得悉佢腎病洗肚，還須捱着返工，不知佢為了數目不輕的退休金？或是政府無人？又或不想政府人事混亂，而頂埋呢幾個月？總之，一邊瞓一邊出糧吧！怎曉得，無幾耐又感染退伍軍人症，停工二十幾日；唔夠兩個月，喺屋企又跌跛手入廠，出院一星期，又再入院做小腸氣手術，真慘！由歡喜佢，到可憐佢，到依家，我有為佢祈禱祝福，但煲呔曾……？只想佢快啲畀人拉！

彭志銘

次文化考古學家，對城中潮語有深入研究，博徵博引，廢官廢人行埋一邊。

歡迎add我facebook一齊鬧爆夕陽政府

就係咁爆：請邊個做政務司司長？

讀者可透過智能手機下載「東方互動」app，於「爆料」項上載影片，每個星期三《太陽報》及ontv同步大爆特爆！

email：sunweibo@opg.com.hk

「就係咁爆」網址：tv.on.cc/hot