政壇：政商定格：吳文遠棄護照捱媽咪鬧
社民連副主席吳文遠早前主動銷毀新西蘭同澳洲兩本外國護照。點解？事關佢有意喺九龍西參選，按照《立法會條例》，要參加直選，一定唔可以持有外國護照。佢話咁做可以顯示佢有破釜沉舟嘅決心，但佢啲屋企人似乎唔係好同意佢嘅做法，佢話媽咪近幾個禮拜不斷哦佢，唔明佢點解無啦啦要銷毀護照，仲同佢講從政無前途，仲叫佢搵過份有前途嘅工添！
雖然佢已全力撲水籌競選經費，但依家嘅籌款額暫時仍然係零，佢話到時如果真係籌唔夠錢，就會印少啲單張同做少啲宣傳，希望可以盡量用最少嘅錢攞個議席返嚟。
南區區議員司馬文係荷蘭人，雖然佢喺香港住咗接近二十年，但仍然未攞特區護照。佢都有計劃代表公文袋參加立會選舉，仲要係區議會超級議席添。如果咁，佢都要放棄個荷蘭護照先再講。
