政壇：會計界選戰七國咁亂

喺特首選戰後，嚟緊九月立法會選舉，相信都係唐梁兩個陣營激鬥嘅新戰場，好似會計界咁，唐梁兩個陣營都有支持者諗住出選。

會計界上屆已經鬥得你死我活，今屆繼續係大混戰格局。梁營現任議員「波波」陳茂波接近必選，但如果佢選擇加入政府，消息指梁營可能游說同為梁營支持者，身兼港區全國人大代表同羅兵咸永道會計師行合夥人嘅雷添良出戰，希望以佢喺會計界打滾幾十年嘅人脈，再加上人大代表身份，搶攻資深從業員同親中會計師行票源。

不過，唐營方面亦冇放軟手腳，唯一一個提名唐唐嘅會計界人士劉麥嘉軒，好可能會替唐營披甲上陣。劉麥嘉軒係行會成員劉遵義太太，又係「四大」會計師行合夥人，無論喺會計界，抑或政經界都深受支持，有力與梁營一戰。

建制派除咗兩營互片外，大家唔好忘記會計界向來有唔少年輕人士參選，上屆有龔耀輝，今屆據聞佢亦心郁郁，再加上泛民會派出梁繼昌出戰，兩人就算贏唔到，都令局勢好似七國咁亂。

飲食界工程界形勢類似

其他功能界別都有類似情況，好似飲食界張宇人，本身提名咗唐唐，預料佢要同投票畀梁振英嘅黃家和一戰；而同樣提名唐唐嘅保險界陳健波，則與梁營蔡中虎互撼；連任多屆嘅工程界何鍾泰，亦有可能受資深工程師嚴建平威脅。以上全部係唐、梁大戰，壁壘分明。建制派要大和解，睇嚟冇咁易。