內地人攻墳掠地 港官僚眼矇耳聾

中港矛盾日益嚴重，內地居民南下爭床位、搶奶粉、搶學額、炒豪宅……咁搞法，香港想唔變戰場都幾難。最得人驚嘅係，呢股由北而下嘅搶掠潮變本加厲，家陣連死人都要落嚟分一杯羹！

新戰場位於中港邊境交界嘅文錦渡庵石下山。嗰度係港府為文錦渡木湖村所設嘅原居民墓地，閒魂不得內葬，但係近年不斷被外人佔據。嗱，非法移民叫黑市居民，非法下葬嘅金塔就係「黑塔」嘞。庵石下山由只有廿九個原居民墓穴嘅清幽山墳，變咗被非法堆放近百個黑塔嘅亂世鬼域。

黑塔來自何方呢？據本報記者現場直擊，黑塔大部分豎立刻有祖籍「深圳向東村」同「深圳向西村」嘅石碑；木湖村只得杜、黃、任三個姓，而黑塔就乜姓都有。唔使問阿桂，墓地被非法侵佔，而入侵者就係來自北面嘅蠻夷一族！

鬼咩！內地墓地價格近年被人炒到飛起，廣州一帶嘅墓地十年間漲價五倍，居民紛紛大嘆「有得死、冇得葬」。內地墓地僧多粥少，慌唔係有人諗到移「魂」外地呢一招，所以嚟香港同「原居魂」爭墓地咩！

咦，「雙非」孕婦來港產子，港府就話束手無策啫，雙非黑塔侵佔墓地，港府唔可以執法阻止嘅咩？唔係唔可以，係懶得理啫。墓地如果屬非法殮葬，民政事務總署同食環署係有權移走金塔嘅。但好可惜，村民○七年投訴到依家，咁多年都冇人理，當局以村代表指黑塔屬原居民所有為由，拒絕跟進。

叮佢個鎯鎯，港府係眼盲定係文盲呀？墓碑都清清楚楚刻住「深圳向東村」、「深圳向西村」啦，咁仲係原居民？港府有法不依，黑塔有恃無恐，梗係源源不絕南下攻墳掠地啦！

話時話，港府骨灰龕位政策一塌糊塗，搞到香港人死無葬身之地，墳穴墓地已經成為最稀有資源。港府一句唔該，任得內地人來港安墳立碑，香港人唔火滾就假！最驚仲係，黑塔問題惡化落去，容乜易成個新界變咗「亂葬崗」？清明啱啱過咗，唔好嚇太一叮呀！

一句講晒，內地人霸佔香港墓地，唔止反映衙門官僚眼矇耳聾，更加顯示成個港府胡混度日，冇心冇肺冇靈魂。原居民橫掂被人侵佔墓地，唔爭在讓一塊出嚟，畀特區政府嗰個爛鬼招牌打包落葬啦，叮！