SUN世代：踏上康「妝」路

十五年前，Mae Von一直夢遊仙境，白日夢如輪轉；又曾為愛情停工兩年，並不在乎生於世上無重要作為。可是父親之死、一場家變，其年少輕狂被燒成灰燼，化為白煙。花了許多心力，她終搞清楚路向，精研化妝。今天，她有兩個名號，一是星級化妝師，二是化妝學校「Miss」，在自己開辦的化妝學校那射燈照耀下，她的笑容特別燦爛。

小時候，Mae想像力豐富，夢想多不勝數：「見到女警好型，就想做警察，後來去Disco跳舞，又想做DJ。」但一切流於空想，Mae第一份工作是售貨員。二十二歲時，她與友人開設模特兒公司，做了四年，發展甚佳，以為終於定性了，怎料卻為愛情放棄前途：「識咗男朋友，佢唔鍾意我做呢行，我就辭職，每日吃喝玩樂。」

兩年後，兩人分手，她驚覺自己與社會脫節，重投社會確有難度。在這前途迷惘的瞬間，霉運再襲，她的父親突然離世：「我屋企好複雜，有幾個媽咪，爹哋係支柱，佢過身就家變，有人拍門爭身家，好似電視劇咁！當時我知道我唔可以再任性。」現實催促成長，她整個人醒過來，開始為前途着緊。

一雙手為12藝人化妝

「當時電影、模特兒咩都做吓。」後來，一位前輩建議她離港，去一個不熟悉的地方平靜一下，思考前路，並建議她去學化妝。於是她遠赴英國修讀三個月化妝課程，自此人生出現逆轉。「其實初初去都唔算好認真，但有次想搵同學食晏，全班二十三個人無人得閒陪我，我先知大家都帶住理想去，只有我唔係，嗰刻我覺得要改變，就更下定決心學好化妝，第一次搵到目標！」下定了決心，燃燒起鬥志，她甚至留在英國繼續學習形象設計。

九八年回港，Mae猶如脫胎換骨：「我打電話去報紙雜誌、經理人公司、模特兒公司，想搵機會做化妝，後來試過一場騷，一個人一雙手為十二個藝人化妝，無助手，但呢段搏殺嘅日子，係好好嘅磨練！」

四年光景，匆匆過去，她成了不少出名藝人的御用化妝師，但此刻，她選擇跳入新國度：「我○四年開始教化妝，因為想為化妝行業出一分力！」她開設專業化妝學校，一邊教，一邊自我提升：「我初初好緊張，對學生好惡，後來不斷檢討，諗點樣先令學生學得更好，依家同學生關係好好，有時落堂都會繼續傾偈到凌晨！」

教學讓她上癮，近年她不斷到慈善團體及學校義務教授化妝，問她為了甚麼，她說是使命感。

「試過教援交少女化妝，令佢哋有專長；亦有去學校做講座，想引發成績無咁好嘅學生嘅興趣，救得一個得一個，化妝好過有其他壞嗜好！」她舉手投足都表現化妝的專業和熱心，那些年那副毫無目標的小女孩模樣，已完全褪色。

Mae's Profile

現職：美坊專業化妝學府、創辦人及專業導師

興趣：化妝