政壇：白老鼠高永文試食蕉柑
著名骨科醫生高永文本身係「潮州冷」，仲經常瞓身宣揚潮州美食同文化，佢唔止一次勁讚潮州蕉柑味道一流，早前潮州商會副會長Michael胡劍江就忽然送贈兩箱蕉柑畀佢。原來Michael諗住學種植蕉柑，於是搵高醫生試食。
估唔到一個柑令到兩個大男人咁瘋狂，身為百年老店胡良利珠寶後人嘅Michael就笑稱本業做金，但走去種柑，全憑一股承傳潮汕文化嘅傻勁。佢勁讚蕉柑冇核、冇渣又清甜，好值得代代相傳。經朋友介紹，輾轉喺潮陽搵到呢種蕉柑，播種前特登搵高醫生試食，咁就包保係柑中極品喇！
Michael已買入五百株柑苗，預計本月底喺廣東與廣西交界嘅雲浮市鬱南縣農場播種，預計三年後先有收成。呢隻胡氏蕉柑上市時，會唔會搵高醫生個嘜頭做生招牌呢？
高永文大讚胡劍江送來嘅潮州蕉柑，清甜又易剝皮。