政壇：區會超級議席白鴿搶位惹火

各黨派對九月立法會新增五個區議會超級議席虎視眈眈，白鴿黨早前開會後決定採用「舊人帶新人」嘅策略，派出現任立法會議員涂謹申同尹兆堅出戰，已經冇再整色整水搞泛民協調，但其他泛民邊有咁易收貨呀！

街工嘅梁耀忠諗住喺新界西選埋呢屆就唔選，為咗扶助黃潤達上位，阿忠叫黃潤達參選區議會超級議席。黃潤達雖然喺葵青區略有名氣，但全港知名度就相對較低，點樣迅速提高佢嘅知名度？去選區議會超級議席係一個方法。但成個街工只得五個區議員，點都要借提名㗎，問邊個借？白鴿黨囉。

另一邊廂，民協亦擬派馮檢基選超級議席，當然亦唔想白鴿黨派兩人參選，因有人覺得既然泛民最多可以喺「六四黃金比」下攞到三議席，平均分畀各泛民黨派理應係最理想做法。有人對白鴿黨口就話協調，實則早已派人參選嘅做法略有微言。鷸蚌相爭漁人得利嘅古仔大家都聽過，不過利益當前，都唔理得咁多。