政壇：鬍鬚曾壓樓價廢噏

「有需要時，我會毫不猶豫推出進一步措施，防止樓市過熱！」稍為留意新聞嘅市民，相信都覺得以上呢句說話熟口熟面。無錯！呢句說話就係出自財爺鬍鬚曾把口。佢尋日喺個人網誌又講一次，但其實佢次次都話會推出措施，但次次都係得個講字。

鬍鬚曾尋日又喺網誌話，唔少數字都顯示近期樓市開始有轉熱迹象，例如三月份送交土地註冊處註冊嘅住宅物業買賣合約總數，按月上升兩倍，個別單位成交呎價仲創出新高。佢仲話現時樓價自○九年起，已累計升咗百分之七十四，即係本身二百萬嘅樓，已經升到去三百五十萬，較九七年高位仲高出五個百分點。

最叻叫唔好放鬆戒備

雖然樓市咁瘋狂，但鬍鬚曾似乎冇乜感覺，佢只喺網誌一味出口術，例如話現時低息環境，加上美國等先進經濟體系繼續實施貨幣寬鬆政策下，好擔心樓市會再次出現亢奮，又叫市民唔好迷信樓價只升不跌，千萬唔好盲目跟風入市喎。

講完一大堆嘢，咁鬍鬚曾究竟有無實際措施壓抑樓價？答案當然係冇！其實，佢出口術都唔係第一次，最叻係叫市民唔好放鬆戒備，要有應對歐債危機嘅準備云云，但次次講完，樓市都係繼續升。今鋪佢自爆樓市已經高過九七年高位，但都只係繼續出口術，死都唔肯推出進一步打擊樓價措施，令港人「上車」難過登天。

喺預算案發表之前，鬍鬚曾最慣常嘅政治伎倆就係「狼來了」，壓低市民嘅期望，而喺壓抑樓價方面都一樣，仲加埋打開口牌呢招，咁仲有冇其他招數呢？如果香港未來五年都係靠佢，港人真係要自求多福啦。