烽火台：ＣＹ上任第一件事

昂坪360纜車日前重開，其管理層一大早列隊歡迎乘客，又派蒸餾水又諸多保證，笑口噬噬話會改善服務，誰知老天好似有意同佢作對咁，下午又雨又雷暴，搞到上午才重開，下午又要停開兩個多小時，唔通夕陽政府衰開有條路？

「昂坪360纜車今天重開」，呢句話真係聽到港人耳仔結繭，有街坊甚至話聽到嘔！咁又係嘅，昂坪360自二○○六年九月正式通車以來，因大大小小、不同類型的事故，暫停服務超過十次，即係話，平均每幾個月就有事發生而要停駛！

講真，昂坪360是東涌地標，更是中外遊客必選的景點，有乜理由短短幾年成日出事？如果不是管理不善，那肯定有鬼整佢！有心水清者預言，根據其出事規律，幾個月停駛一次，下一次暫停服務，將會係今年八月，若然，就真係邪門！

事實上，纜車管理層明顯管理欠佳，呢句話並非小生高見，而係機電署講嘅。梗係，今年年初三嘅故障，竟然係因滑輪潤滑油水分太多所致，大佬啊，纜車處高位，又近海，稍有常識嘅都知防潮不能掉以輕心啦，如今才話有「改善空間」，遲唔遲啲，低唔低B啲呢？

忍耐真係有個程度，如果昂坪360再頻頻出事，停吓開吓，政府真係要強政勵治，CY上任第一件要做嘅事就係撤換管理公司，小生先拍掌祝賀！