零團費死灰復燃 旅遊業亂象依然

老千出沒注意！曾經搞到旅遊業聲名狼藉、斬到旅客一頸血嘅「零團費」問題，又死灰復燃喇！

橋唔怕舊，最緊要受。有人今次同樣係用難以抗拒嘅所謂「着數」做噱頭，不過就學精咗，知道零團費個朵已經臭晒，一於玩變種，用廉價旅遊券氹人落疊。

話說近排有內地無牌旅行社喺拍賣網站兜售旅遊券，憑券再加幾百蚊，就可以來港玩四日三夜嘞，直頭抵到爛。旅行社仲話，因為港府同大財團贊助每人幾千蚊，至可以咁筍嘅咋，講到似層層咁。

實情係點？旅遊業議會最近半年收到約十宗旅客投訴，指呢啲旅行團除咗徵收各種巧立名目嘅費用，仲帶團友去黑店強迫購物。議會直指呢啲係零團費翻版，已將個案轉交國家旅遊局跟進。

殺人放火有人做，蝕本生意無人吼。旅行社貼埋錢請遊埠？邊有咁大隻蛤乸隨街跳吖！羊毛出在羊身上，超出成本嗰部分，一定會通過其他手段，例如帶旅客去黑店購物、收取無厘頭嘅額外費用等，連本帶利賺番夠，同零團費根本係一路貨色！

近年旅遊業亂象叢生，劏客醜聞不絕於耳，嚴重損害本港國際形象，港府監管失職，成為千夫所指。當局迫於民意，早前建議成立「旅遊業監管局」，取代旅遊業議會嘅監管角色。不過，當局話立法需時喎，最快都要兩至三年至可以正式實施。

立法可以等，但監管唔可以等。旅遊業係一塊肥豬肉，零團費又點會自動消失，你有張良計，佢有過牆梯，就算立法通過，旅監局成立，「惡阿珍」、「刀手蓉」唔會就咁收手，一定頻頻變招，繼續劏客。

弊在跛腳鴨政府就快收皮，官老爺個個夕陽心態，唔係掛住同富豪勾勾搭搭，黐飲黐食，就係把握最後機會周遊列國，仲要唔遠唔去、唔貴唔去嗰隻。講到監管旅遊業咯喎，梗係賴得就賴、拖得就拖，乜嘢都推畀下屆政府喇。

話時話，如果當局監管到位，老千點可能輕易得手吖。計太一叮話齋，零團費死灰復燃，旅遊業再響警鐘，係時候叮醒班懶官，如果唔主動出擊，繼續放任自流，無監無管，旅遊業呢條經濟支柱冧咗，佢哋就係千古罪人喇，叮！