SUN人論壇：筍工在手不知足

唔知大家心目中嘅筍工係點o架呢？年薪百萬？有房屋津貼？有交通津貼？年年放大假？

其實，全世界最筍嘅工，遠在天邊，近在眼前。無錯，就係我哋嘅特首！

先同大家係咁意講吓特首嘅待遇：職級屬於正部級，即係仲高級過省委書記；年薪四百萬；一年仲有二十二日年假，即係幾乎有一個月唔使撈。

可能有人會話，咁做得香港揸fit人，有咁嘅待遇都好應分啫。咁你又知唔知其他國家嘅話事人年薪係點？英國首相年薪不過二百幾萬，法國總統都係咁上下；至於我哋祖國嘅總理，一年都係得嗰四皮幾嘢咋！連特首嘅百分之一都未必有呀陰功！

呢份工人工高，福利好，唔怪得煲呔曾成日嗌住話要「做好呢份工」。聽真啲，哦！原來佢係要「做呢份好工」啫！

最唔明嘅係，點解煲呔曾揸住份世紀筍工，仲要人心不足蛇吞象咁貪盡海陸空呢？雖然話佢係「貪盡」，但其實貪嚟貪去都係啲小便宜，搭吓順風船食吓免費飯咁。喂大佬吖，你貪都貪得有大志啲吖！

好，本身有大好前途，你又唔珍惜，每年逗住納稅人四百幾萬，又唔見你為香港做番啲咩？雙非問題又唔理，搞到啲大肚婆雞毛鴨血；住屋問題又唔管，搞到供層樓要輪迴供幾世。其實，用和珅嚟同貪曾比，真係委屈咗和珅o架，人哋和珅雖然貪，但一嚟靚仔，二嚟醒目，幫乾隆解決咗好多問題，好過舊黑面番薯多多聲啦！

本欄逢星期日見刊。園地公開，歡迎就時事局勢發表意見。請附上個人資料，電郵至sunmanforum@gmail.com