政壇：搞搞政：音響太靚失資助 鄉局孭債千萬

新界鄉議局石門大樓用咗接近二億元去興建，外貌宏偉、內部裝修亦美輪美奐，連演奏廳嘅設備都好超水平，據講呢套音響耗資過千萬元，夠晒專業。不過，原本答應捐助新大樓嘅馬會最近卻因為呢套設備太勁而say no，鄉議局主席劉皇發亦因而無端添咗新煩惱！

馬會本身係非牟利團體，每年慈善捐款不計其數，發展到今日，每筆捐款都有規有矩，唔係話捐就可以捐o架。鄉議局本身亦係法定諮詢組織，由於唔係牟利組織，向馬會索捐好合理，今次之所以出問題，全因演奏廳嗰套過千萬嘅音響太專業，馬會先後有三個部門到場視察，最終都係認為呢套音響唔可以算係「必須項目」，超出資助範圍，所以咪撞板囉。

講來講去，鄉議局九龍塘舊會址仲未賣出，家吓仲差緊銀行數，好彩馬會答應得捐畀鄉議局，一定唔會走數，鄉議局新大樓其他必須開支，佢哋仍然會資助，所以發叔解決問題應該都唔難。另外，為提高大樓使用量，鄉議局已致函多個團體同舞蹈學校，邀請佢哋租用大樓，算係做番啲嘢啦。