政壇:社福界批貪曾扶貧捧蛋

爆出涉貪醜聞嘅煲呔曾就快執包袱,佢一向被人批評懶理基層,尋日社聯行政總裁方敏生及社區組織協會主任何喜華就同佢算帳,兩人不約而同大鬧煲呔曾任內無搞好扶貧工作,令貧窮人口有增無減。何喜華仲表明,佢支持梁振英(CY)做特首係因為對現屆政府感到極度失望。估唔到煲呔曾劣「績」斑斑,間接幫到CY拉票添。方敏生尋日喺電台節目中開名鬧煲呔曾「一直視社會福利為負累,寧可派錢也不願作出長遠服務規劃和承擔」,佢話,減少貧窮同解決服務不足唔等於搞福利主義,可惜煲呔曾任內貪盡大小便宜,卻懶理升斗市民為基本生活奔波同困擾。

何喜華尋日更憤以「極度失望」講佢對政府嘅睇法,話坐擁巨額財政儲備嘅政府懶理籠屋、劏房呢啲都市恥辱,公營房屋政策照顧唔到低下階層。佢仲剖白話,撐CY係因為一來對煲呔曾死心,二來係認同CY嘅「穩中求變」理念。

第一手消息請下載on.cc東方互動iPhone/iPad/Android/Windows Phone Apps

搵樓18即睇最新樓價走勢、最全面地產新聞及筍盤情報