政壇：唐營C18瀕解體

特首選舉落幕，前政務司司長唐英年嘅超級班底喺高呼聲下冧檔，一眾追隨者惟有雞飛狗走、另謀新路，向有唐家家臣之稱嘅立法會議員廠商會代表林大輝兩年前搞咗個C18（社區十八）嘅團體，成立嘅時候已被視為唐唐後備軍，家吓就面臨解體，更有參加咗嘅區議員一早「跳船」挺梁，只要睇沙田區議員龐愛蘭、元朗鄉事派首腦梁福元近排嘅選擇就知喇，講到尾，另覓新船新航道，總好過攬住隻船沉喇。

造勢大會被遺忘

仲記得一○年六月底，大輝聯合一大班區議員組成嘅地區組織C18，當時網羅咗好多獨立無黨派嘅區議員加盟，除咗上述兩人外，仲有沙田區議員姚嘉俊、中西區區議員陳財喜等，聲勢可謂一時無兩，有區議員加入C18後私下交流時都話，有晒心理準備為唐唐日後落區做先頭部隊，甚至為佢開山劈石亦都在所不辭。不過，一切最終只係佢哋一廂情願，甚至係空想。有C18成員爆料話，唐唐喺去年九月底離開政府後，除咗部分C18核心成員有份喺唐唐嘅造勢大會幫吓手外，其他成員大部分時間都被遺忘，有成員更慘到連電話都冇收到一個添。

事實上，C18各成員睇到唐唐民望一路每況愈下時已各有盤算，尤其係今年九月就有立法會選舉，政途另有打算嘅人都一早諗定應變之法，甚至「跳船」挺梁，其中本身係新論壇成員嘅龐愛蘭同沙田「地膽」公民力量快將好事近，目標梗係立法會選舉；而原本撐唐嘅十八鄉事委員會主席梁福元，亦喺特首選舉後同梁「大和解」有傾有講，有面對前景仍然舉棋不定嘅C18成員都希望，大輝可以盡快開會穩定軍心，否則難保會有更多人醞釀退出C18，屆時C18進一步自我萎縮甚至面臨解體，只係時間問題。