上樑不正下樑歪 香港遍地小學雞

禮儀之邦乏禮儀，怪獸都市多怪事。知書識禮係家長對兒童嘅基本要求，可惜香港家陣再冇呢支歌仔唱咯，愈來愈多兒童既唔知書，亦唔識禮，甚至小小年紀已淪為「小學雞」，問你驚未！

有調查發現，逾八成受訪初中及小學生當別人照顧係老奉，甚少對家長同外傭講「唔該」，成為學童十大無禮行為榜首；七成二兒童收咗禮物之後好少主動講「多謝」；而乘搭公共交通工具時衝入車廂霸位嘅，有近八成咁多。

開講有話，有其父必有其子，小朋友唔懂規矩無禮貌，原來係父母負面影響潛移默化嘅結果。七成四受訪家長承認，自己亦好少講「唔該」；七成二自爆，坐車時會為子女爭位；對於子女嘅無禮行為，大部分家長表示唔會即時指正，而係聽之任之。更離譜嘅係，唔少家長自己做埋反面教材，經常或間中責罵長輩。

叮！呢啲咪叫為老不尊，教壞子孫囉！正如調查機構負責人話齋，學童品德問題嚴重，家長應該自我反省，以身作則，為子女樹立良好榜樣，唔應該只關心下一代嘅學業，將品德教育責任推晒畀學校。

冇錯嘞，「養不教，父之過」。小朋友良好品德嘅形成，家長言傳身教必不可少。弊在香港父母多數只重智育，忽視德育，過度保護同溺愛子女，令小朋友一個個變成嬌生慣養嘅「港童」。

今時今日，有媽咪竟然擔心已經十二歲嘅仔女唔識過馬路，暗中跟蹤返學，問你服未！

話時話嘞，兒童品德差，家長固然有責任，學校亦走唔甩，「教不嚴，師之惰」吖嘛。本港教育七國咁亂，話就話「求學唔係求分數」，實際上一切都係分數掛帥，學校一味填鴨式教育，德育似有若無，加上有啲教師其身不正，學生想唔學壞都幾難喇，叮！

其實，莫講教師吖，煲呔曾腐敗墮落，一味掛住群埋富商攞着數，黐飲黐食黐遊艇黐飛機，對民生疾苦不聞不問，官場道德失範，香港淪為烏煙瘴氣嘅怪獸都市，兒童耳濡目染，點可能唔受污染吖。

計太一叮話齋，家長為老不尊，學校為師不尊，政府為官不尊，港童有樣學樣，自我中心，刁蠻無禮，又有乜出奇吖，叮！