政壇：KK被阿Paul分薄鐵票

工聯會KK黃國健做咗立法會九龍東直選議員三年幾，表現尚算平穩，平日問政嘅風格同言論都受到傳媒注意，照計冇理由有危機，但據聞工聯會最近計過數，發現KK手上嘅鐵票，計極都唔足以令佢成功連任，工聯會高層大為驚訝。

消息人士話工聯會同建仔早前已收到指示，要過票畀空降九東嘅旅遊界議員阿Paul謝偉俊。我哋之前已經講過，阿Paul舊年因喺外傭居港權一事上打擊公文袋有功，加上本身嘅律師專業背景，結果受到賞識，獲全力支持出戰九東直選，務求搶埋新增嘅第五個議席。

原來一直支持工聯會、同陳婉嫻極度友好嘅東九龍居民委員會嘅鐵票已撥歸阿Paul，加埋觀塘區部分獨立區議員已被安排去支持佢，工聯會冇咗呢批選票，選情即時變得唔樂觀。

據聞地區人士都質疑點解愛國愛港嘅工聯會受此對待，消息人士仲話工聯會會長鄭耀棠近日不斷同有關方面說項力保KK。依家工聯會冇嘢驚，最怕西環唔開綠燈，而班街坊會員又太過老定唔去投票，搞到KK輸咗就大件事嘞！