政壇：紀文鳳轟貪曾心術不正

梁振英（CY）正式成為候任特首後，之前幫佢嘅競選辦成員亦相繼開腔接受訪問，繼競選辦主席張震遠同主任羅范椒芬後，其中一位副主任紀文鳳尋日亦上電台節目。紀文鳳今時今日雖然身為大地產商新世界發展嘅高層，但做開品牌推廣嘅佢仍然不脫媒體人本色，尋日開口批評煲呔曾涉嫌貪腐嘅行為係「心術不正」，敢言程度搞到主持人都窒一窒。

CY引用覺光法師金句

做開廣告同品牌推廣，紀文鳳當日加入CY陣營好自然就係做番呢方面工作。佢透露，CY競選工程主要分三部分，中段嘅主旨係「行之正道，穩中求變」。競選團隊當日之所以會強調「行之正道」，全因CY當日喺某個公開場合回應市民提問時，主動引用覺光法師嘅說話：「行之正道，便是好」，紀文鳳一聽，覺得合晒當時嘅競選環境，所以就建議CY用嚟做競選主軸。

行之正道可以話係知易行難，就連節目主持亦話，所謂正道，可能人人心中都唔一樣，好似煲呔曾接受富豪款待咁，佢都唔覺得係錯o架，咁又係唔係正道呢？CY會唔會只係走自己心中嘅「正道」o架？紀文鳳一聽到呢條問題，都未聽到主持問完咋，即時回應話煲呔曾呢啲絕對唔係「正」，而係「心術不正」喎！

紀文鳳又爆料，話CY爭取佛教界選委投票支持時，特登同覺光法師講自己亦引用對方「行之正道」嘅概念，佛教界選委最終有九個投票支持CY，唔通真係同呢樣有關？

紀文鳳話當初同自己老闆新世界發展主席鄭家純講要幫CY助選時，對方曾經質疑只係浪費時間；雖然係咁，CY勝出後，紀文鳳亦邀老闆為CY站台，力撐相信老闆選特首時投下「良心一票」咁話。