纜車不能錯過 管理不容過錯

大家都知，太一叮有班長期賓客，好似周周衰幾鑊嘅食物及衞生局局長周一嶽、「香港第一貪」曾蔭權、「氣候逃兵」環境局局長邱騰華同埋「史上最廢財爺」曾俊華咁，衰嘢醜聞長叮長有，堪稱太一叮之友。

其實，香港烏煙瘴氣，抵畀太一叮狠狠叮爆嘅，又豈止呢幾件吖，好似有一件出晒名吊吊揈嘅蠢鈍物體，一樣超級抵叮o架！講緊嘅唔係港府前二哥唐英年，而係同佢有關亦同樣經常「吊吊揈」嘅昂坪纜車。

昂坪360，纜車頻頻停，搞到遊客唔係敗興而歸，就係要食驚風散，何止丟架，簡直趕客，早就被太一叮叮爆鎯鎯。嗱，聽日開始，纜車公司又有機會玩殘遊客，事關停駛兩個月後終於重開，遊客半天吊嘅驚險情節隨時重演。

成件事係咁嘅，年初三昂坪纜車爆出八百名遊客半天吊嘅國際醜聞，其後宣布全面停駛，調查原因兼更換懷疑肇事嘅七組啤令零件。好嘞，事隔兩個月，纜車公司宣布聽日重開，而機電工程署亦公開調查結果，揭發纜車日常運作甩漏多多，唔到你唔擔心o架！

調查報告揭露，年初三纜車事故源於連串人為疏忽，好似職員疏忽啦、保養欠妥啦、監察不足啦，最後出現「油溝水」事件。咩係「油溝水」？簡單嚟講，纜車靠滑輪輸送，滑輪需要潤滑劑，但係纜車公司居然將潤滑劑暴露喺潮濕環境，水分過多嘅潤滑劑效能大降，因而影響滑輪運作，最終結果就係搞到纜車停駛，累及八百名遊客被困「冰廂」飢寒交迫差唔多兩個鐘。

點解纜車公司會有「潮濕環境」嘅呢？你可以話係因為位處高山有霧氣，但係，全世界嘅纜車大部分都建於高山環境o架啦，點解人哋又冇事，而昂坪纜車就周而復始咁出事？一句講晒，吊吊揈嘅管理作風出問題囉！計太一叮話齋，機電署最需要調查嘅，係查吓纜車管理層嘅腦袋。

你話係咪搞笑吖？纜車嘅宣傳口號自稱係「不能錯過的香港旅遊景點」，點知自己就頻頻犯過錯，日常運作甩漏百出，搞到成日停駛，玩殘遊客，影響香港旅遊業。不如咁啦，宣傳口號改為「不容過錯的香港旅遊景點」，當做自我警惕啦！

嗱，纜車聽日重開，醒醒定定咪出事呀，復活節到嘞，如果又害到遊客雞毛鴨血，太一叮一定叮爆你！