政壇：搞搞政：炒人三議案料煲無米粥

立法會喺十八日嘅大會要處理三項有關炒人嘅議案，包括譴責白鴿黨議員甘乃威、罷免社民連議員「長毛」梁國雄，同埋針對煲呔曾涉嫌收受利益嘅不信任動議，但預計喺泛民同建制派各自護短下，三項議案都係煲無米粥，否決收場。

負責調查甘威「求愛不遂」怒炒女助理嘅調查委員會早前發表報告，結果一如所料係咬佢唔入，加上泛民早已表明會力撐甘威，譴責議案肯定唔夠票通過，調查所需嘅一百五十七萬元公帑就咁掉落鹹水海。至於旅遊界議員謝偉俊因應長毛被法庭判監兩個月而提出嘅罷免議案，亦預計喺部分泛民議員反對下會被否決。

護短呢家嘢並非泛民嘅專利，煲呔曾貪盡富豪海陸空款待，引起全港市民公憤，但一班建制派仍然對呢個負資產不離不棄，死撐到底，預計由陳淑莊提出嘅不信任動議亦會凍過水。立法會應調查嘅唔查，應炒魷嘅唔炒，真係香港嘅悲哀！