政壇：陳達文出橋搞文化局
候任特首CY梁振英競選時提出成立文化局，做過文化署署長、又擔任過香港藝術發展局主席嘅陳達文日前出席一個活動時，就提議CY應該推動多啲H股公司資助文化節目，好似外資咁每年預留一筆錢推動文化，一來有助香港文化界發展，二來亦對提供贊助嘅公司有利，達致雙贏。
陳達文話依家政府有錢，投放多啲落文化實冇死，事關搞文化唔使好多錢，少少已經令業界好開心，而且搞文化一定冇人反對。佢又透露CY提出成立文化局都係聽咗佢嘅提議，事關佢認為依家民政事務局同康文署一齊負責文化事務，太過架床疊屋喇，不如好似以前教育署同教統局咁，局署合併仲好喎！