填海好高騖遠 拓地本末倒置

香港地少人多，可以講係寸金寸土，如果唔係，港府前二號人物唐英年嘅約道豪宅都唔使向地心發展，僭建地下王宮喇。

面臨土地供不應求，港府高官成日話巧婦難為無米之炊，為咗解決「地從何來」嘅困境，當局早前建議喺維港以外二十五個地點填海造地。本來呢，填海唔係唔得，問題係爭議好大，跛腳鴨政府不自量力，引爆炸彈，製造爭拗，睇怕都係添煩添亂居多。

即係咁，香港急需開疆拓土，以應付建屋同社會發展需要，呢個冇錯係事實，之但係填海係咪最好辦法，就值得商榷嘞。嗱，港府嘅填海計劃諮詢尋日屆滿，有環保組織一於反對到底，力數呢個「無中生有」填海造地大計嘅害處。

環保組織係咁講嘅，全港大包圍填海，就算唔會破壞維港美景，亦會影響美麗海岸線，更加會將香港吉祥物中華白海豚趕盡殺絕，造成生態災難。佢哋告誡港府，善用土地嘅治本之道，係減少雙非嬰兒同單程證配額，控制人口，減少土地需求，同埋盡量開拓新界荒地，而唔係捨近求遠走去填海。

環保組織就講得啱嘞，香港土地缺乏，其實係當局未能做到地盡其用啫。唔信嘅話，大家不妨打開地圖睇吓，新界大把土地荒廢，唔係養草，就係養蚊，點解港府唔去開發呢啲土地，反而走去打填海嘅主意呢？咁何止係捨近求遠，直頭係捨本逐末啦，叮！

再講，港府係不折不扣嘅跛腳鴨，動輒得咎，寸步難行，連喺新界起個焚化爐咁簡單嘅事，講咗N年都未有聲氣，何況填海咁大爭議性嘅話題，盞攞嚟搞嘅啫，隨時又司法覆核，又萬人上街，到頭嚟填海唔成反而激起民憤。呢，話口未完，日前薄扶林區有小學發起口罩活動，抗議當局喺沙灣填海造成空氣污染。事實證明，填海講就容易做就難，搞得嚟都唔知乜嘢世界咯。計太一叮話齋，不如等滄海自己變桑田吖，笨！

一句講晒，填海造地本來無可厚非，可惜爭議大、成本貴、時間長，遠水難救近火，完全不切實際。正如候任特首梁振英所講，香港已開發嘅土地只係兩成左右，仲有八成未開發，港府與其浪費時間打填海主意，不如盡快諗吓點樣好好利用新界荒地好過喇，叮！