SUN微博：香城司局夢幻班底

2046年，唐太挾全城民意榮登特首之位，甫上任即大行改革，推「三司七局制」，內閣人選堪稱夢幻班底，《Sun微博》同你逐個點評！

政務司司長林鄭妹

感謝主！妹妹我終於坐正……姐姐唔好嬲，你六十歲都唔係好老啫！拉吓面皮咪又係熟女一個，你做副都唔差呀。

秘書 葉劉姐（從略）

律政司司長Long Hair

「梁國雄議員！」唔單止係網民金句，仲係潮文添。佢成日衝擊香城法律，難怪「公義女神」都冇眼睇！算啦，畀佢做埋律政司司長，咪唔使又畀人「叉能住」（challenge）囉。

財政司司長巴士阿叔陳乙東

選舉要睇政綱，咪睇黑材料！巴士阿叔話要每人派$40萬呀！孖曾先死死地氣派$6000咋！乜話？香城700萬人只得6999999人撐佢？係喎，唔記得「四眼仔」冇份添！

保安局局長甄子丹

丹爺公認宇宙最強，單人匹馬亦足以應付一眾非和平、非理性之暴力示威人士，掟蕉擋蕉，衝門頂門。一身橫練好武功更可一個打十個不明黑影，絕不手軟，包無「攝」住！

教育局局長（兼任香城第一先生）唐唐

考試壓力大，唐唐識搞咁多「課外活動」，學子一定輕鬆好多。唔講唔知，佢仲係語言天才嚟o架，「三碌軨」、「條條fing」……兩文三語冇難度。佢個「核心論」仲玄過金句天王黎明，直情哲學都掂呀！「冇—呃—人o架」！

公公務員事務局局長林瑞麟

簡稱公公局。眾所周知，林公公務員事務經驗十足，處理大內事務手起刀落，去勢實一時無兩。由林公擔任公公局局長一職實為最佳安排，定能令一眾公務員士氣大振。

江湖飯局局長（兼任廉署專員）煲呔曾

黑超花恤，霸氣十足，成個澳門大佬咁款，唔做飯局局長嘥晒。有佢坐鎮，座位一定冇爭拗。菜式喇喎，一定冇熊掌食囉。仲有，廉記咖啡嘅味道、貪污犯嘅犯罪心理佢都掌握得一清二楚o架！

政制及內地事務局局長向西村上春樹

連雞煲同內地色情業嘅微妙關係都留意到，真係唔簡單，中港另類「融合」指日可待。佢篇《我們死也要到香港生寶寶》嚇到雙非唔敢南下，可謂居功至偉。仲有由副局長「小明」李家仁射住，無論上廣州、去東莞都咁掂。

運輸及房屋局局長劉皇叔

劉皇叔駕駛技術無人能及，尤擅於傾向性轉軚，轉向快過風，處理運輸問題自然得心應手。而且劉皇叔長於建屋，一層變三層，三層變七層，可極速解決本港房屋問題。

醫管局局長孫明揚

門常開風水唔好，個穿心煞邪到成班官變咗病歪。孫公通過波仔，又染埋退伍軍人症，搞到差啲「退伍」，最近跌親慘變「獨臂」楊過，真係黯然銷魂！佢成日喺醫院出出入入，同啲護士咁熟，一定好了解佢哋嘅需要。

就係敢爆：交通費勁加點算好？

讀者可透過智能手機下載「東方互動」app，於「爆料」項上載影片，每個星期三《太陽報》及ontv同步大爆特爆！

email：sunweibo@opg.com.hk

「就係敢爆」網址tv.on.cc/hot