政壇：搞搞政：建仔獨家「梁粉」侯志強無份

特首選舉前，一場因鄉事飯局惹出嘅風波震撼政圈，選後傳出雙方大和解。大前日，候任特首梁振英（CY）到訪元朗，更同參與過流浮山飯局嘅元朗六鄉主席握手合照，不過，尋日CY落北區上水，就唔見有份出席飯局嘅上水鄉事委員會主席侯志強蹤影。點解侯志強冇落去握手泯恩仇，佢就話根本唔知CY去咗佢地頭，仲質疑建仔有意「包起」CY。

前晚深夜我哋致電侯志強，問佢點解唔趁CY到訪上水區時大家見面握手和解？佢話完全唔知件事，經過一輪調查，我哋先知原來CY今次落上水，係由民建聯負責安排行程，期間完全冇通知過北區鄉事派，唔似CY去元朗時叫埋元朗六鄉，北區四鄉主席冇咁嘅待遇，難怪侯志強好氣憤質疑民建聯想獨佔鎂光燈。

另外，侯志強亦唔想多講流浮山飯局：「人哋都做咗特首囉，你仲想我點？」佢強調鄉事派一向愛國愛港，一定唔會因某人當選或唔當選，就變身反對派喎。